Alqı-satqı müqaviləsinin bağlanmasında əsasən iki tərəf iştirak edir. Malı (əmtəəni) satan tərəf - satıcı və malı (əmtəəni) alan tərəf - alıcı. Müqavilə şərtləri tərəflərin istəyi və qarşılıqlı tazılaşması ilə müəyyənləşir. Lakin kontrakt əsasən aşağıdakı bəndlərdən ibarət olmalıdır.
- Ümumi hissə, müddəalar,
- Müqavilənin məqsədi, mövzusu,
- Məhsulun qiyməti, müqavilənin ümumi dəyəri (pul ifadəsi ilə),
- Miqdarı, keyfiyyəti, qablaşdırılması və markirovkası,
- Göndərmə (yola salma) şərtləri,
- Tərəflərin vəzifələri, öhdəlikləri,
- Ödəniş qaydası, forması,
- Fors-major,
- Reklamasiya, cərimə, sanksiya,
- Arbitraj,
- Digər müxtəlif şərtlər,
- Tərəflərin rekvizitləri, hüquqi ünvanları və s.
Alqı-satqı müqaviləsinə görə satıcı malı alıcının mülkiyyətinə verməli, alıcı isə malı qabul edib əvəzində müəyyənləşdirilmiş pul məbləğini ödəməyi öhdəsinə götürür. Satıcı alqı-satqı müqaviləsində nəzərdə tutulmuş malı (əmtəəni) alıcıya verməyə məcburdur.
Satıcı malı (əmtəəni) alıcıya verməklə eyni zamanda onunla bağlı müqavilədə nəzərdə tutulan və qanunvericilikdə müəyyənləşdirilmiş müvafiq sənədləri də (texniki pasportu, gömrük yük bəyannaməsini, keyfiyyət sertifikatını, əmtəə-nəqliyyat qaiməsini və sair) verməyə borcludur.
Alqı-satqı müqaviləsində tərəflərin razılığı ilə ödəniş forması, nəqliyyat növü, yükün qəbul edilmə məntəqəsi, yola salma şərtləri, qablaşdırma və digər məsələlər öz əksini tapmalıdır. Müqavilə aydın, hər iki tərəf üçün başa düşülən formada, tərəflər üçün məqbul qaydada tərtib olunmalıdır.